藝人鄧佩儀（Gloria）於新劇《換命真相》擔大旗做女一，拍攝進行得如火如荼，不過近日就有傳佢壓力爆煲搞到頻頻NG，被指「累街坊」嘅佢就令到要陪佢重拍嘅譚俊彥向友人呻爆，更有傳男二張頴康躁到喺片場發火！呢件事好快就傳到去張頴康耳邊，佢就忍唔住喺社交網「開咪」澄清，強調佢同鄧佩儀都係合作得十日、八日，何來會有不和呢！？
張頴康晒出兩張同鄧佩儀嘅合照，見二人整古做怪咁Selfie，另一張就溫馨拖實小演員隻手，望落又真係唔似不和喎。張頴康仲留言指大家都好少見佢發火，仲「鬧」鄧佩儀如果唔夠瞓都早到現場拍攝，佢就真係會發火喇！之後佢又指其實佢兩個都只係合作咗十日、八日，仍然磨合中，又叫大家畀啲空間佢哋，明嘅明嘅，都係想拍好劇畀大家睇啫。
