因應新型肺炎,唔少酒店同餐廳都開拓外賣服務,而家連Afternoon Tea Set都可以外賣自取,或安排外送服務!將自己屋企變成Home Cafe,咁就食得放心又可以繼續打卡呃Like啦。
30周年藝術外賣下午茶 樂聚廊
![](https://static5.orstatic.com/userphoto/Article/0/6K/001AQJC548CB3EB34878D3j.jpg)
金鐘呢間酒店開業30年,最近搵嚟俄羅斯籍藝術家Anna Salenko合作,推出藝術外賣下午茶。無論係4層架定係小熊紙盒設計都好精美。4層架上總共有24件鹹甜點,包括法式迷你週年紀念蛋糕 (法國柑桔果醬和黑朱古力慕斯)、意寧谷Tiramisu芝士蛋糕等。另外仲會送限量港麗小熊公仔同TeaWG 香茗茶包。
訂購方法:於官方網站訂購後,指定日期時間到店提取
Butterfly Patisserie 外賣自取精緻下午茶
![](https://static5.orstatic.com/userphoto/Article/0/6H/001A6039412BF6927C29DCj.jpg)
尖東呢間酒店都推出全新外賣自取下午茶,分量可供2-3人享用,有齊多款鹹甜點,包括特色三文治、時令甜點、招牌大溪地雲呢拿千層酥,同下午茶唔少得嘅新鮮焗製英式鬆餅!配搭士多啤梨果醬、香橙果醬、奶油忌廉同兩個自選茶包(英式早餐紅茶或伯爵茶)。
訂購方法:於官方網站訂購後,指定日期時間到店提取
茶園 經典下午茶
![](https://static5.orstatic.com/userphoto/Article/0/6H/001A3C5C5A95E5D44252F4j.jpg)
君悅酒店最近推出經典下午茶嘅外賣版本,招牌伯爵茶英式鬆餅、鮮蝦及龍蝦泡芙、芒果烏龍茶撻等等都有齊。可惜嘅係外賣就無咗即點即製甜品吧和雪糕櫃,無得瘋狂食雪糕啦。不過法式酒桶蛋糕、馬卡龍同松露朱古力都有喺外賣盒當中,而且外賣自取有85折!
訂購方法:於官方網站訂購後,到店提取或安排外送服務
GREEN 飄香榴槤下午茶
![](https://static5.orstatic.com/userphoto/Article/0/6H/001A3D61BD00550184A493j.jpg)
榴槤控注意!尖東呢間酒店推出「飄香榴槤下午茶」外賣套餐,由有「榴槤王子」之稱嘅糕餅行政總廚何偉誠師傅用馬來西亞直送貓山王榴槤果肉入饌,創作出D24迷你芝士蛋糕、抹茶荔枝D24榴槤卷、貓山王榴槤布甸、榴槤斑蘭糯米糍等一系列榴槤甜品。
訂購方法:於官方網站訂購後,指定日期時間到店提取
DK Cuppa Tea 夢幻飄雪樂園下午茶
![](https://static5.orstatic.com/userphoto/Article/0/6A/0018SXFEADCA59D36B5BB2j.jpg)
![](https://static5.orstatic.com/userphoto/Article/0/6H/001A5Y60BD502B71018E1Cj.jpg)
上環呢間由香薰品牌開設嘅茶室亦有Tea Set外賣自取/外送服務,而且仲包埋三層下午茶紙架!佢哋Tea Set不時更換主題,最近就係藍色嘅「飄雪樂園」,淺藍色嘅伯爵茶馬卡龍、木馬伯爵茶曲奇帶佛手柑獨特香氣,配鬆餅玫嘅瑰果醬花香濃郁。
另外最新仲即將會喺8月17號推出兩款下午茶,分別係「寵幸遊蹤下午茶」同「森林搖籃曲」下午茶,前者仲可以加購狗狗專享下午茶零食盒,同狗仔一齊嘆tea~ 至於後者則係以貓貓做主題嘅野餐籃,貓仔頭+patpat+腳掌造型嘅棉花糖超kawaii呢~ 不過食完個籃係要交還返嘅留意返。
訂購方法:於官方網站訂購後,到店提取或安排外送服務
更多【全城抗炎】專題: 1. 送上門懶人煮食包及套餐大合集2.0 花膠燉湯/火鍋/鐵板燒 2. 將屋企變Cafe 網購咖啡包/冷泡茶/甜點推介 3. 新手在家 也能輕鬆自製Cocktails 雞尾酒禮盒+教學 |
四季酒店The Lounge 經典雙人下午茶
![](https://static5.orstatic.com/userphoto/Article/0/6A/0018SW4899248D142291B6j.jpg)
香港四季酒店日前新增網店,由行政餅房主廚Ringo Chan 主理,唔單止有齊各款麵包、蛋糕,連經典下午茶都可以外賣自取返屋企慢慢嘆!紙盒特別設計成四層,擺滿英式鬆餅,精緻鹹點、甜品。鬆餅係手工製作,每日新鮮烘焙。
訂購方法:於官方網站訂購後,指定日期時間到店提取
Fortnum & Mason 經典英式下午茶
![](https://static5.orstatic.com/userphoto/Article/0/6H/001A3B4759CB5A8BE36D13j.jpg)
呢個嚟自英國嘅零售及餐飲品牌推出全新外送菜單,當中就包括享負盛名嘅經典英式下午茶。有齊手指三文治,原味、提子乾鬆餅配果醬三重奏及凝脂忌廉,同精選下午茶蛋糕。最後配返兩杯Royal Blend紅茶,即係1902年為英王愛德華七世調配嘅皇家紅茶!
![](https://static5.orstatic.com/userphoto/Article/0/6A/0018U0000FB55B1353E1F5j.jpg)
呢間得到英國皇家認證嘅過江龍人氣店亦新出外帶鬆餅,每日12:00、14:00,同16:00分三轉新鮮出爐,有原味同提子乾兩款口味,數量有限售完即止。去到仲可以揀埋心水茶葉同果醬呀。
購買方法:親臨分店外賣自取或用指定手機程式
半島酒店餅房 英式鬆餅連茶包
![](https://static5.orstatic.com/userphoto/Article/0/6A/0018SZ6BF878CC70EBDF73j.jpg)
雖然唔係三層架,不過如果鐘情英式鬆餅嘅話,亦可以考慮半島酒店嘅經典下午茶及鬆餅Set,包括半島特色鬆餅(原味及提子乾口味)、士多啤梨果醬、酒店自家製奶油同茶包。始終係日賣超過600個嘅名店,質素自然有保證。