「尋找」係一個過程，今日就由尋找一間隱世小店，繼而尋找自己喜歡嘅味道，好味又難忘。呢間位於大圍嘅尋味，主打川辣雞煲、烤魚同串燒，用多層次嘅味道深深吸引我哋嘅味蕾。
藤椒魚皮
魚皮非常爽口彈牙，帶有藤椒香味，口感微辣，加上芫荽、雲耳、芝麻，令香味更突出，非常醒胃。
川味皮蛋
流心嘅皮蛋蛋黃已經係贏在起跑線，加上麻辣同芫荽香味嘅點綴，確實開胃。
夫妻肺片
夫妻肺片可以話係川菜嘅代表食物之一。用上牛肚、牛舌作為材料，微辣香麻，更上青瓜一齊食，非常清新爽脆。
煙肉車厘茄
燒過嘅車厘茄同燒菠蘿一樣，甜甜酸酸好吸引！加上煙肉嘅鹹香，味道非常豐富。
肥腸雞煲半隻
雞有半隻，份量十足，加上肥腸，又向豐富，越煮越香！雞肉非常入味，肉質嫩滑；至於肥腸煙靭，索晒雞煲嘅精華，食唔停口。
女神檸檬茶、招牌鴨屎香檸檬茶
怕辣又想食辣，最緊要就係叫返兩杯嘢飲。女神檸檬茶粉紅色，真係好啱各位粉色系女神打卡，味道係帶有少少士多啤梨味，但係都完全冇蓋過檸檬茶嘅味道，入面仲有蒟蒻唔係好單調嘅檸檬茶；至於招牌鴨舌香檸檬茶就啱晒一眾男神，即場手打唔會太酸，同時又可以飲到香水檸檬嘅味道。
