今日同M佬嚟到位於銅鑼灣嘅立鮨，舖頭嘅日式裝飾，日文嘅歡迎光臨，更重要係香港少見嘅立食文化，讓我地重拾久違嘅日本之旅。立鮨嘅魚生選擇好多，除咗可以選擇自己鍾意食嘅款式，亦可以選擇廚師發板，品嚐當日最新鮮嘅魚生添。
火炙左口魚邊壽司
經過火炙嘅左口魚邊，係我哋最愛，魚油十分豐富，帶點焦香，入口即溶。
劍魚腩壽司
次次同M佬食壽司，劍魚腩都係佢嘅必叫之選，因為佢好鍾意劍魚腩獨特嘅肉質。劍魚腩肉身呈白略帶淡紅色，肉質柔軟脂肪多，鮮甜而不膩。
油甘魚腩壽司
油甘魚腩非常厚實滑嫩，魚肉細緻甘甜，非常新鮮。
北海道特大珍寶帶子壽司
Menu話特大又珍寶，上枱嘅時候真係不負所望，帶子後生又大隻，肉質彈牙鮮甜，完全唔捨得吞落肚，好滿足。
大吞魚腩壽司
好味嘅吞拿魚真係好好味（我係咪講緊廢話？），吞拿魚厚切，油脂分佈平均，入口即溶。
北海道活象拔蚌壽司
雖然我哋一向都少食象拔蚌刺身，但嚟到呢度，一定要試試，象拔蚌好鮮甜，彈牙有夠爽脆。
針魚壽司、梭子魚壽司、平貝壽司
師傅建議先食左邊嘅針魚，之後食中間嘅梭子魚，最後先食平貝，咁就可以由有淡口味食到重口味，欣賞到魚鮮嘅層次。針魚屬於螢光魚，部份人會驚佢會有腥味，其實加咗蔥同少少薑，反而提升佢嘅鮮甜味！梭子魚微微燒過，令魚油更突出；至於平貝味道甜香，肉質比較酥脆爽甜。
