春天是個好佳節，然而被落雨摧毀了我嘅計劃囉！唔想被春天梅雨季節影響行程，不如玩啲室內活動啦。想有得玩又有得食嘅室內活動，點少得去釣蝦場呢？今次我哋嚟到觀塘嘅HalloLand釣蝦場，挑戰一吓自己嘅釣蝦技術啦！
HalloLand釣蝦場
非常寬敞，而且環境乾淨企理，重點係大家都有指定分隔空間，唔會太迫挾。HalloLand以每小時收費計算，壽星同學生仲會有優惠添，釣蝦場另提供夜貓子優惠時段，所有收費都已經包一枝釣竿同一盤蝦餌添！
釣蝦區
作為釣蝦嘅初哥，HalloLand釣蝦場嘅職員非常細心介紹釣蝦嘅技巧，例如蝦係需氧量好高嘅生物，所以近打氣機嘅區域，就會見到充滿活力嘅鮮蝦，當確認蝦食餌之後，就可以將釣竿垂直往上拉起。如果幸運釣到帶有絲帶嘅蝦，仲會有唔同嘅獎勵添！
但講到釣蝦嘅必殺技，其實就係耐性，而作為第一次釣蝦，估唔到每人都釣到5-6隻，好有成功感呀！另外，每隔一段時間，職員就會加啲新嘅蝦落池，確保蝦池內嘅蝦新鮮同充滿活力。我哋仲釣到一隻帶有粉紅色絲帶嘅蝦，可以轉一次幸運輪呀！
